Raunfærnimat

Hefurðu starfað við iðngrein án þess að hafa lokið sveinsprófi? Því ekki að kynna sér þá möguleika sem raunfærnimat í iðngrein hefur upp á að bjóða? Skilyrði fyrir raunfærnimati í iðngrein eru að minnsta kosti 5 ára staðfestur vinnutími í greininni og að þú sért að minnsta kosti 25 ára. Hafðu samband við Fræðsluskrifstofu rafiðnaðarins eða IÐUNA fræðslusetur, til að fá frekari upplýsingar um hvort raunfærnimat sé tækifæri fyrir þig.

Raunfærnimat gengur út á að staðfesta og meta raunverulega færni þína í skilgreindum verkum eða námsefni án tillits til þess hvernig eða hvar þú hefur náð færninni.

Raunfærni er samanlögð færni sem þú hefur náð til dæmis með starfsreynslu, starfsnámi, frístundanámi, skólanámi, félagsstörfum og fjölskyldulífi.
Þegar rætt er um raunfærni eru eftirfarandi skilgreiningar oft notaðar:

Formlegt nám: Færni sem þú náðir og fékkst viðurkennda með útskrift eða prófskírteinum frá formlegum skólayfirvöldum.
Óformlegt nám: Færni sem aflað er í námi utan skólakerfis, til dæmis hjá símenntunarmiðstöðvum, námsflokkum eða með námskeiðum á vinnustað. Þessi færni er oft staðfest með skírteini eða viðurkenningu á þátttöku.
Formlaust nám: Færni sem þú hefur öðlast í gegnum daglegar athafnir tengdar starfi, fjölskyldu eða frítíma en hefur hvorki skírteini né aðra staðfestingu á að þú hafir náð þessari færni.

Sjá bækling Fræðslumiðstöðvar atvinnulífsins um raunfærnimat